Ahura Mazda

Ahura Mazda

Biografía
Período	Mitoloxía persa
Celebración	Zoroastrismo e mazdeísmo
Obra
Obras destacables (hai 4.540 millóns de anos) Terra
Familia
Fillos	Mitra, Tishtrya
Irmáns	Arimã
Descrito pola fonte	Enciclopedia de Otto Pequeno dicionario enciclopédico de Brockhaus e Efron Dicionario Enciclopédico Brockhaus e Efron

Ahura Mazda (en avéstico: Ahura Mazdā), chamado Ohrmazd ou Hormizd en persa medio e tamén coñecido tradicionalmente como Ormuz, é a divindade suprema do zoroastrismo. O seu nome adoita interpretarse como «Señor Sabio» ou «Señor da Sabedoría», aínda que a análise exacta do termo Mazdā é discutida.

Nas Gathas, atribuídas a Zaratustra (Zoroastro), Ahura Mazda aparece como creador e como garante de asha, principio de verdade, orde e xustiza. Na mitoloxía persa, antes do establecemento do zoroastrismo, Ahura Mazda era un dos principais deuses nativos. Hai moitas formas do seu nome.

Asociase a miúdo coa deusa Anahita, que aparece nominalmente xunto con Ahura Mazda. En época aqueménida tardía, Anahita aparece asociada a Ahura Mazda e Mitra (a partir de Artaxerxes II). Os reis aqueménidas atribuían a súa autoridade real principalmente a Ahura Mazda.

Zaratustra situouno no centro da súa doutrina relixiosa, transformando unha antiga divindade iraniana na divindade suprema da nova fe. Por riba de todo, Ahura Mazda representa a Bondade perfecta, o completo oposto do Mal. Non permite o sufrimento aínda que estea a suceder debido á existencia do Mal. A visión que del tivo Zaratustra foi o punto de partida do zoroastrismo. A Enciclopedia Galega Universal describe igualmente a Ahura Mazda ou Ormazd como o deus supremo establecido por Zoroastro no mazdeísmo.

Ahura Mazda e o mal

A concepción da oposición entre o ben e o mal evolucionou ao longo da historia do zoroastrismo. Nas Gathas, Angra Mainyu é o espírito destrutor oposto a Spenta Mainyu, mentres que na tradición posterior, especialmente nos textos en lingua persa media, Ahrimán aparece directamente como o adversario de Ohrmazd.

No seu aspecto principal, Ahura Mazda é a Sabedoría; non engana e non pode ser enganado xa que é a fonte da luz e de toda bondade. Ahura Mazda é o Pai e a Nai do Universo segundo a tradición zoroastriana tardía, o creador eterno que puxo o sol, a lúa e as estrelas nos seus camiños. Na cosmoloxía zoroastriana posterior, Ohrmazd habita na luz pura e Ahrimán nas tebras.

Ohrmazd é eterno (é e será para sempre). Pero na era actual Ahura Mazda non é omnipotente porque se enfronta ao seu acérrimo inimigo, o espírito maligno; O mundo convértese no escenario dunha loita limitada no tempo entre ambos principios, que debe rematar coa derrota definitiva de Ahrimán e coa separación do ben e do mal.

Culto e representación

Representación de Cosroes II (centro) entre Ohrmazd (dereita) e Anahita (esquerda), en Taq-e Bostan.

No Avesta e noutras escrituras, Ahura Mazda descríbese en termos naturalistas (iso non significa que todos os zoroastrianos pensen nel dese xeito).

Leva un manto con estrelas. Está representado polo sol -o seu ollo- e a luz. O seu trono está situado no ceo máis alto, no medio da luz celestial. Alí preside e é atendido por anxos.

Ahura Mazda foi tamén a principal divindade invocada nas inscricións reais dos aqueménidas, especialmente nas de Darío I, quen atribuía a Ahura Mazda tanto a creación do mundo como a concesión da súa autoridade real.

As representacións antropomórficas da divindade apareceron en épocas posteriores. Durante o Imperio sasánida, Ohrmazd foi representado en relevos relacionados coa investidura real.

Véxase tamén

Bibliografía

• Hinnes, John R. (1985). Persian Mythology (en inglés). Londres: Newnes. ISBN 9780600342823. 

Outros artigos

• Zoroastrismo
• Zaratustra
• Anahita
• Ahrimán

---

Este artigo sobre relixión é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---