Ordino

Ordino adolah salah ciek dari tujuah paroki di Andorra nan talatak di bagian paliang utara nagara tu. Sabagian wilayahnyo marupokan daerah utamo lambah sungai Valira del Nord atau Valira d'Ordino. Ibu kotanyo iolah kota Ordino. Pado tahun 2017, panduduaknyo bajumlah 4.858 jiwa.

Geografi

Paroki ko babatehan jo Parancih, sarato paroki La Massana, Canillo, dan Encamp. Satu-satunyo jalan utamo sarato satu-satunyo pangubuang jo wilayah lainnyo sapanjang tahun adolah jalan CG-3 manuju paroki La Massana. Jo laweh 85 km2, paroki ko manjadi tagadang katigo sasudah Canillo jo Encamp. Kota Ordino talatak di kaki gunuang Casamanya (2740 m), sabuah gunuang nan mampunyoi pamandangan panorama spektakuler dari puncaknyo karano talatak hampia di tangah-tangah Andorra.

Sijarah

Asa-usua namo paroki Ordino jo ibu kotanyo baasa dari zaman pra-Romawi, jo patamo kali didokumentasian dalam Acta de Consagració i Dotació de la Catedral de la Seu d'Urgell (Akta Pantahbisan jo Pambarian Hibah Katedral La Seu d'Urgell), pado abaik ka-9, sabagai Hordinavi atau Sant Cebrià d'Hordinavi.

Sacaro historis, paroki Ordino dikenal dek pabrik basinyo pado abaik ka-16, tautamo Farga del Serrat dan Farga de l'Areny. Salain itu, Ordino dianggap sabagai pusek budaya Andorra. Paroki ko mampunyoi warisan sijarah barupo gareja-gareja tuo bagaya Romanesque sarato rumah-rumah bangsawan nan manggamabaran kahidupan kalas ateh pado abaik ka-17–19, nan kini dijadian museum.

Paroki dan kotanyo manjadi asal namo legenda Andorra, El buner d'Ordino, di mano surang pamain bagpipe dari Ordino, dalam pajalanan manuju alek di Canillo, dikaja jo dinaiaki dek sarigala hinggo naiak ka ateh batang, tapi bahasia manakuik-nakuikinyo jo suaro alaik musik.