Homs

Homs
حمص‎

Valdkund	Sirii
Eläjiden lugu (2017)	775,404 ristitud
Pind	48 km²
Pämez'	Marhaf Al' Naasan
Telefonkod	+963-(0)31
Aigvö	tal'vel UTC+2, kezal UTC+3

Lidnan kart (2013)

Homs (sijaline pagin حُمْص Ḥomṣ [ħɔmsˤ]), mugažo Hims (arab.: حمص‎ Ḥimṣ [ħɪmsˤ]), om Sirijan koumanz' surtte lidn. Se om Homsan agjan (muhafazan) administrativižeks keskuseks da palaks.

Istorii

Eländpunktan aluz om pandud läz 2000. vot edel meiden erad, mainitase kirjutadud purtkiš 1. voz'sadaspäi EME. Lidn oli tetab amuižes mirus Emes-nimitusenke (amuižgrek.: Ἔμεσα Emesa). Kändihe islamanuskojiden lidnaks i sai nügüdläšt nimitust 7. voz'sadal. Lidn tuli lanktushe Osmanan imperijas i šingotaškanzihe möst 19. voz'sadal, konz puvillan ümbriradmižen tegimišt eli korktas aigas läbi. Rahvahanikoiden sodan aigan Homsan blokad (semendku 2011 — semendku 2014) toi äi vigoid lidnan rajonoile, niiden sur' rekonstrukcii jätktase vspäi 2018.

Homs oli tegimištoližen keskusen edel rahvahanikoiden sodad Sirijas (kivivoin i puvillan ümbriradmine). Lidn jäb Sirijan päivlaskman transportteiden keskuseks.

Geografijan andmused

Lidnümbrikon sijaduz agjas i valdkundas vn 2012 kartal

Lidn sijadase valdkundan päivlaskman keskuzpalas, 501 m ü.m.t. keskmäižel korktusel. El'-Asi-jogi (Oront) jagab lidnad päivnouzmaižeks (amuižemb) i päivlaskmaižeks palaks.

Matkad Damask-pälidnhasai om 162 km suvhe orhal, järedha Aleppo-lidnhasai om 193 km pohjoižhe, Tartus-meriport om ühesakümnes kilometras päivlaskmha.

Klimat om subtropine Keskmeren. Keza om päivoikaz lujas, tal'vaig om pil'vekaz. Voden keskmäine lämuz om +17,0 C°, kezakun-sügüz'kun +24,0..+26,5 C°, tal'vkun-uhokun +7,0..+8,2 C°. Paneb sadegid 429 mm vodes, enamba tal'vkus-uhokus (77..95 mm kus), vähemba kezakus-sügüz'kus (5 mm pordos).

Tobmuz

Edeline lidnan pämez' om Abdullah Al' Bavab.

Eläjad

Vl 2004 lidnan eläjiden lugu oli 652,609 ristitud 48 km² pindal. Kaikiš suremb lidnan ristitišt oli 823 tuhad eläjid vl 2008, agjan läz pol't.

Ristitišton uskond om erazvuitte, vn 2016 lopus islamanuskojad otiba koume nelländest, alavitad 15 %, hristanuskojad kümnendest.

Al'-Baas-universitetan aluz om pandud vl 1979 (arab.: جَامِعَة الْبَعْث Džāmiʻat Al' Baʻs). Se mülüb Sirijan järedoiden universitetiden nell'hä, 99 tuhad üläopenikoid opetas vl 2023, edel 2011. vot 120 tuhad üläopenikoid oli siš.

Irdkosketused

• Lidnan oficialine sait (homscitycouncil.org.sy). (arab.)